Bu işdə atalığın müəyyən olunması ilə bağlı məhkəmə araşdırmasının ədalətli aparılmaması mübahisələndirilir

02.03.2010. Azərbaycan Hökuməti ilə Avropa İnsan Hüquqları Məhkəməsi (Avropa Məhkəməsi) arasında daha bir şikayətlə bağlı kommunikasiya başlayıb.

1 sentyabr 2000-ci ildə nikaha daxil olan Azərbaycan Respublikasının vətəndaşı M.Rəsulov (bundan sonra Ərizəçi) ailə qurduqdan 3 ay sonra nikaha xitam verilməsi tələbi ilə məhkəməyə müraciət etdiyi zaman məlum olub ki, onun arvadı hamilədir. Ərizəçi arvadının ona xəyanət etdiyini və doğulacaq uşağın da onun olmadığını iddia edib. O, özünü uşağın atası hesab etmədiyinə görə atalığın mübahisələndirilməsi və nikaha xitam verilməsi tələbi ilə Əzizbəyov Rayon Məhkəməsinə müraciət edib.

21 iyun 2001-ci ildə, məhkəmə proseslərinin davam etdiyi müddətdə Ərizəçinin arvadı oğlan uşağı dünyaya gətirib və uşaq Ərizəçinin övladı kimi qeydiyyatdan keçirilib. Atalığın müəyyən edilməsi məqsədilə təyin edilən bioloji ekspertizanın nəticəsində Səhiyyə Nazirliyi Ərizəçinin uşağın bioloji atası olması barədə rəy verib.

Bioloji ekspertizanın nəticəsi məlum olduqdan sonra məhkəmə qəti nəticə əldə etmək məqsədilə DNT testi təyin edib. Səhiyyə Nazirliyinin ekspertinin rəyində, DNT testinin nəticələrinə əsasən göstərilib ki, Ərizəçi uşağın bioloji atası deyil. Bioloji ekspertiza və DNT testi arasında olan ziddiyyəti aradan qaldırmaq məqsədilə təyin edilən əlavə ekspertiza nəticəsində müəyyən edilib ki, DNT testinin nəticələri daha dəqiq və əsaslı olduğundan o, bioloji ekspertizanın nəticələrindən üstün tutulmalıdır.

11 may 2006-cı ildə Əzizbəyov Rayon Məhkəməsi ərizəçinin atalıqla bağlı iddiasını təmin edərək, onun uşağın bioloji atası olmaması barəsində qətnamə çıxarıb.

Hər iki tərəf Əzizbəyov Rayon Məhkəməsinin qətnaməsindən Bakı Apellyasiya Məhkəməsinə şikayət verib. Şikayətdə Ərizəçi boşanma tələbini irəli sürüb, cavabdeh isə atalığın mübahisələndirilməsinin nəticələri ilə razılaşmayıb.

4 sentyabr 2007-ci ildə Bakı Apellyasiya Məhkəməsi Əzizbəyov Rayon Məhkəməsinin qətnaməsini ləğv edərək iş üzrə yeni qətnamə çıxarıb. Məhkəmə öz qərarını belə əsaslandırıb ki, Ərizəçi və cavabdeh hamiləliyin olduğu müddətdə birgə yaşayıblar, bu da, uşağın atasının məhz Ərizə olduğu qənaətinə gəlməyə əsas verir. Məhkəmə ekspert rəylərini nəzərə almayıb və bunu həmin rəylərin işin digər halları ilə ziddiyyət təşkil etməsi ilə əlaqələndirib.

20 noyabr 2007-ci ildə Ali Məhkəmə Ərizəçinin Apellyasiya Məhkəməsinin qərarından verdiyi kassasiya şikayətini rədd edib.

Ərizəçi ölkədaxili müdafiə vasitələrini tükəndirdikdən sonra İnsan hüquqlarının və əsas azadlıqların müdafiəsi haqqında Konvensiyanın (Konvensiya) 6-cı maddəsi ilə təminat verilən ədalətli məhkəmə araşdırması hüququnun pozuntusu ilə bağlı Avropa Məhkəməsinə şikayət ünvanlayıb.

Ərizəçinin hüquqlarını Avropa Məhkəməsində hüquqşünas Ruslan Yolçuyev müdafiə edib.

Hüquq Maarifçiliyi Cəmiyyətinin
İnformasiya xidməti

Çap üçün versiya

Geri qayitmaq